2 iyun tarixində müstəqil “Sıfır” teatrında Anton Çexovun “6 nömrəli palata” əsəri əsasında hazırlanmış eyni adlı tamaşanın nümayişi olub.

Şəhərdən kənarda, unudulmuş xəstəxananın 6 nömrəli palatasında 3 dəli yaşayır. Onlardan biri adlı-sanlı İvan Dmitriçdir. Günlərin bir günü xəstəxananın baş həkimi Andrey Yefimiç dəliləri ziyarət etməyə gəlir. İvanla arasında baş tutan söhbətlər Yefimiçi sarsıdır. Ağıl ilə dəlilik arasındaki sərhəd, yaşantı və əzab haqqında düşüncələr süjetin əsasını təşkil edir.

Tamaşa psixoloji dram janrındadır və absurd üslubunda qurulub. Səhnələşdirmənin müəllifi Mirtalib Həsənov, tamaşanın qurluşçu rejissoru Səid Abbasov, musiqi tərtibatçısı Fuad Məmmədov, səhnə tərtibatçısı Anar Buluddur.

Rollarda Anar Bulud (İvan), Orxan Bakinski (Andrey Yefimiç), Orxan Abışov və Kənan Balakişiyev (Mayseyko), Rəvan Mehdi (Poçtalyon), Şükür Babayev (Nikita) və Samir Əliyev (Xobotov) çıxış edirlər.

Qeyd edək ki, müstəqil "Sıfır" teatrı artıq bir ildir fəaliyyət göstərir. Teatr 2023-cü ilin 30 mart tarixində yaradılıb. Teatrın bədi rəhbəri Mirtalib Həsənov, baş rejissoru Səid Abbasovdur. Teatr pərdələrini Anton Çexovun “6 nömrəli palata” əsəri əsasında hazılanan tamaşa ilə açıb.

Tamaşada istifadə edilən səhnə dekorasiyası, rekvizitlər və tamaşaçılar üçün oturacaqlar tullantı məhsullarından hazırlanır. Hazırda teatrın repertuarında iki tamaşa var – “6 nömrəli palata” (A.Çexov) və “Utancaq qız” (F.Dostoyevski). Teatrın kollektivi yeni tamaşalar üzərində işləyir.

Nailə Qasımova

Tələbə-teatrşünas