Azərbaycan Respublikasının Mədəniyyət Nazirliyi və Teatro.az sənət portalının birgə təşkilatçılığı ilə keçirilən, “Şuşa ili”nə ithaf olunmuş II “4.4 Qısa Tamaşalar Festivalı” başlayıb.

25 noyabrda Azərbaycan Dövlət Akademik Milli Dram Teatrında  iştirakçıların qeydiyyatı ilə festival işinə başlayıb. Qeydiyyatdan sonra Azərbaycan Respublikasının Xalq artisti, Türkiyə Çukurova Universiteti Dövlət Konservatoriyasının professoru Cahangir Novruzovla görüş keçirilib. Daha sonra Nigar Güləhmədovanın quruluş verdiyi “Küknarlara məktub” (müəllif Goderdzi Çoxeli) tamaşası nümayiş olunub. Xronometrajı 44 dəqiqə olan tamaşada əsas rolları Elşən Rüstəmov, Almaz Amanova, Rüstəm Rüstəmov, Ayşad Məmmədov, Dilarə Səlimova, Firuzə Balayeva, Elnur Qədirov, Lalə Süleymanova, Ramin Şıxəliyev ifa ediblər.

Günün ikinci yarısında Azərbaycan Dövlət Gənc Tamaşaçılar Teatrında quruluşu, səhnə və musiqi tərtibatı Elşad Rəhimzadəyə məxsus “İnanıram” (müəllif Ülviyyə Heydərova) monotamaşasına baxış olub. Tamaşada Ana obrazını Zemfira Əbdülsəmədova canlandırıb. Hər iki tamaşa xarici qonaqlar üçün ingilis dilinə sinxron tərcümə edilib.

Festivalın rəsmi açılış mərasimi saat 19:00-da Azərbaycan Dövlət Akademik Musiqili Teatrında baş tutub.

Qeyd edək ki, noyabrın  30-a qədər davam edəcək  II “4.4 Qısa Tamaşalar Festivalı” na giriş sərbəstdir.