1 noyabr tarixində Azərbaycan Respublikasının Mədəniyyət Nazirliyi və Teatro.az sənət portalının təşkilatçılığı ilə keçirilən “4.4 Qısa Tamaşalar Festivalı”(QTF) başlayıb. Açılış mərasimi Akademik Musiqili Teatrında baş tutub.

Tamaşaların nümayişindən öncə səhnəyə çıxan Festivalın direktoru Elçin Cəfərov, layihə rəhbəri Vidadi Qafarov, kreativ-direktor Emin Əliyev, Mədəniyyət Nazirliyinin İncəsənət və qeyri-maddi mədəni irs şöbəsinin müdiri Fərəh Acalova çıxış edərək fesival iştirakçılarını salamlayıb, onlara uğurlar diləyiblər. 

Çıxışçılar 22 tamaşanın qatıldığı tədbirin geniş əks-səda doğurduğunu, ölkəmizdə ilk dəfə olaraq, belə bir formatda festivalın keçirildiyini və burada təkcə dövlət teatrlarının deyil, həmçinin özəl teatrların və müstəqil sənətçilərin fərdi qaydada iştirak etdiyini xüsusi qeyd ediblər.  

Çıxışlardan sonra tamaşaların nümayişi başlanıb. Festivalın ilk günü 5 tamaşa nümayiş olunub. “44” (Müəllif və rejissor Zaur Əliyev), “İki əsgər” (Müəllif Günay Arda, rejissor Sevda Məmmədova), Müharibənin qadın üzü yoxdur” (Akademik Milli Dram Teatrı. Müəllif Svetlana Aleksiyeviç, rejissor Emil Əsgərov), “Missiya” (Sumqayıt Dövlət Musiqili Teatrı. Müəllif Hafiz Ataxanlı, rejissor Firudin Məhərrəmov), “Qoruq” (”Teatral” studiyası. Müəllif Səbinə Məmmədova, Mirvüqar Nəsirov, rejissor Tural Baxış) tamaşaları seyrçilər və münsiflər heyəti tərəfindən maraqla qarşılanıb.  

Tamaşaların videoformatda nümayişindən sonra münsiflərin və tamaşaların yaradıcı heyətinin iştirakı ilə müzakirə keçirilib. Müzakirədə münsiflər heyətinin sədri Əməkdar incəsənət xadimi, professor İsrafil İsrafilov, münsiflər Əməkdar incəsənət xadimi, professor Aydın Talıbzadə, Əməkdar incəsənət xadimi, professor Əli Əmirli, Əməkdar incəsənət xadimi Mehriban Ələkbərzadə və Xalq artisti Pərviz Məmmədrzayev çıxış edərək, tamaşalar barəsində dəyərli fikirlərini iştirakçılarla bölüşüblər. 

Xatırladaq ki, xalqımızın 44 günlük Vətən müharibəsində qazandığı zəfərə həsr olunan “4.4 Qısa Tamaşalar Festivalı” noyabrın 5-dək davam edəcək.